Сице убо бысть малымъ прежде сихъ лѣтъ, сущю самодержцю всея рускыя земля Володимеру, вънуку же Иолъжину (Ольгину) а правнуку Рюрикову: ходиша же слугы его въ Болъгары и въ Нѣмци, и видѣша скверная дѣла ихъ; и оттолѣ идоша въ Царьградъ, и видѣша украшеніа церковная и чинъ божественныя службы, изрядная архийерѣйская лѣпота, пѣнья же и ликы, и предстоянія дьяконъ; и ту пребыша 8 (?) дній [2]. И царь же Василей и Констянтинъ отъпустиша я с дары и с честию; они же пріидоша в Русь. Володимеръ же созва бояры своя и старцы, и рече имъ: се пріидоша посланніи нами, да слышимъ отъ нихъ бывшая. И рекоша слугы ходившая [3]: яко смотрихомъ како покланяются Болгаре в ропатѣ (храмѣ или капищѣ) стояще без пояса; и поклонився сядеть и глядить сѣмо и овамо, акы бѣшенъ; и нѣсть веселья в нихъ, но печаль и смрадъ великъ; и нѣсть добръ законъ ихъ. В Нѣмцехъ же многы видѣхомъ въ храмѣхъ службы творяща, а красоты никоея не видѣхомъ въ нихъ. Пріидохомъ же въ Грекы, въ Царьградъ, и ведоша ны, идѣже служать Богу своему, и не вѣмы на небесѣ ли есми былѣ, или на земли: нѣсть нигдѣже такова видѣнія, ни красоты такия недоумѣемъ сказати; токмо то вѣмы, яко тамо Богъ со человѣкы пребываетъ, и есть служба ихъ лучши всѣхъ странъ. Мы убо не можемъ забыти красоты тоя: всякъ бо человѣкъ аще вкусить сладка, послѣди не прииметь горести; тако и мы, Княже, не можемъ здѣ быти, но идемъ тамо. Боярѣ же рекоша: аще не бы былъ добръ законъ Греческый, то не бы прияла Олга, баба твоя. Володимеръ же рече: воля Господня да будетъ! И умысли въ собѣ: сице сътворю.
Минувшю же лѣту, иде с вои на Корсунь. Корсунянѣ же боряху крѣпко съ града. Володимеръ же рече: аще ми ся не предасте, стояти имамъ за три лѣта. Они же не послушаша, и стоя шесть мѣсяцъ [4]. Бѣже в Корсуни мужь, именемъ Анастасъ; сей написавъ на стрѣлу и пусти ю къ Володимеру: ко кладязю отъ въсточныя страны града въ градѣ по трубамъ воды сведены; копавъ преимѣ я [5]. Князь же, слышавъ, рече: Господи Боже! Аще ми се сбудется, абіе крещюся. И повелѣ копати въпреки трубамъ, и переяша воду. Людие же въ гради изнеможаху жажею (жаждою) водъною, и предашася. Он же, вземъ градъ, посла къ царемъ, къ Василію и къ Констянтину, въ Царьградъ, глаголя има: се градъ вашь славный взяхъ; слышахъ же, яко имаета сестру дѣвою, – дайте ю за мя; аще ли ми ея не даста, азъ и Царьграду тако сътворю посему. ?на же отвѣщаста: намъ недостоить за некрещеныя давати, но крещение пріимеши; аще ли сего не сътвориши, не дадѣмъ сестры своея за тя. Володимеръ отвѣща посланнымъ: пришедшее отъ васъ крестятъ мя. И посласта царю (цари) Анну, сестру свою и с нею воеводы и прозвутеры (пресвитеры), и пріидоша в Корсунь. А Володимеръ разболѣся. Епископъ же с попы Корсуньскими и с попы царицины, огласившее, крестиша въ церкви святаго Иякова [6] в Корсунѣ градѣ, и нарекоша имя ему Василей. И бысть чюдо дивно и преславно: яко възложи руку нань епископъ, и абіе цѣлъ бысть отъ язвы. Възрадовася сердцемъ, и абіе цѣлъ бысть отъ язвы. Възрадовася сердцемь, и мнози отъ бояръ его въ томъ часѣ крестишася; и постави церковь в Корсунѣ на горѣ святаго Василія [7].
И посемь поимъ царицю, Анастаса и попы Корсуньския, с мощми святаго Климента и Фива, ученика его, поимав же (взявъ) иконы изборныя (избранныя) и книгы. А градъ Корсунь вдасть царема за вѣно, сестры дѣля ею. И самъ в Киевъ вшедъ, повелѣ испроврещи и избити кумиры, овыи иссещи, а иныя ижжещи; а Волоса идола, егоже именоваху скотья бога, велѣ в Почайну рѣку въврещи [8]; Перуна же повелѣ привязати к коневи, къ хвосту, и влещи с горы по Боричеву на ручей; а слугы пристави бити идолы жезлиемъ. Се же не яко древу чюющю, но на поруганію бѣсу, иже прелщаше ны симъ образомъ. Плакахужеся его невѣрніи люде (люди): еще бо бяху не пріали святаго крещения. И привлекшее кумира Перуна, въвергоша и въ Днѣпръ рѣку, и проплы порогы, извѣрже и вѣтръ на брегъ: и отътолѣ прослу (прослыла) Перуня гора. И положи заповѣдь по всему граду, да утрѣ вси обрящутся на рѣци, богатъ ли, или убогъ, или нищь, или работенъ. Да се же людіе слышавшее, радостно течяху, глаголющее: аще бы се не добро было, не бы сего князь и бояри прияли. На утрѣя же изыде Володимеръ, с попы царицины и съ Корсуньскими, и снидеся бещисла (безъ числа) народа: влѣзше в воду до шея, а иніи до персій, младіи же по брегу, а жены младенци держаще: а папы на брезѣ молитвоваху. И бысть радость велика крестившимся людемь, и идоша кождо (каждый) в домы своя. Володимеръ же радъ бывъ, яко позна Бога самъ и людие всѣ, и помолися: Боже, сътворивый небо и землю, и море, и вся яже въ нихъ! Призри на люди твоя, и дай имъ познати Тебе, и утверди в нихъ вѣру неблазнену, а мнѣ помози на врагы, да побѣжю и. И повелѣ крестьяномъ ставити церкви по тѣмъ мѣстомъ, идѣже кумиры стояли; а самъ постави церковь святаго Василья на холмѣ, идѣже стоялъ Перунъ идолъ. И повелѣ попомъ по градомъ и по селомъ люди ко крещенію приводити и дѣти учити грамотѣ.
Минувшю же лѣту, умысли создати церковь святыя Богородица, пославъ приведе мастера отъ Грекъ. Свершенѣ же ей бывши, украсі ю, и иконами удививъ, и поручи ю Анастасу Корсунянину; и попы Корсуньския пристави служити въ ней; и вдасть в се (все) имъ, еже бѣ взялъ в Корсуни, и кресты; и отъда отъ всего имѣніа десятую той Церкви и отъ града. Бѣ бо велми милостивъ, по словеси Господню, иже речеся: блажени милостивіи, яко тѣ помилованѣ будуть [9]. Бяху же нищи приходящее на дворъ его по вся дни, и пріимаху, кто чего требоваше; а недужнымъ, немогущимъ ходити, повелѣ слугамъ, да в домы приносять имъ. И многы створи добродѣтели. Умре же на Берестовѣмь, и потаиша и, бѣ бо Святополкъ в Киевѣ. И нощию же межи клѣтьми пріимавше [10] помостъ, в коврѣ опрятавше, и ужи (веревки) свѣсиша на землю; и положиша на сани, везшее поставиша и в святѣй Богородици, юже бѣ самъ создалъ. Се же увѣдавше людие, снидошася безщисла; и плакашася по немь, боляре акы заступника ихъ земли, и убозѣи яко и кормителя. Оле чюдо! Яко вторый Иеросалимъ на земли явися Киевъ, и вторый Моѵсѣй Володимеръ явися. Онъ стѣнный [11]законъ въ Иеросалимѣ, отълучяюще отъ идолъ, а се чистую вѣру и крещеніе святое, въводящее в жизнь вѣчную. Онъ – ко единому Богу веляше въ законъ пріити, се ж вѣрою и святымъ крещеніемъ просвѣти всю рускую землю, и приведе къ Пресвятѣй Троици, къ Отцу и Сыну и Святому Духу; и добродѣтелью получи жизнь вѣчную, и люди, тому ж научивъ, введе въ царство небесное. Онамо къ единѣмь Апостоломъ рече Господь: не бойся малое мое стадо [12] здѣже ко всѣмъ тоже речено. Онамо – 40 дній и з Моисѣй и законъ давъ преставися, и на горѣ погребенъ: се ж 30 лѣтъ и 3 бывъ во святомъ крещеніи, вѣру чистую съблюдъ, заповѣди свершивъ Господня, преставися, в руцѣ Божіи душю свою предавъ [13]. И тѣло же его честное вложиша въ гробъ мраморянъ, и съхраниша с плачемъ благовѣрнаго князы.
И бысть вторый Констянтинъ в русской земли Володимеръ: се есть новый Констянтинъ великого Рима, иже крестився самъ, и люди своя крести; тако и се сътвори подобно ему. Аще бо бѣ и прежде в поганьствѣ на скверную похоть желая, но послѣже прилежа к покаянію, якоже Апостолъ вѣщеваеть: идѣже умножится грѣхъ, ту изобилуеть благодать [14]. Аще бо в невѣжьствѣ етера (другія) съгрѣшеніа быша, послѣ же раскаяшася покаяніемъ и милостынями. Якоже глаголеть: в чемъ тя застану, в томъ тя и сужю; якоже Пророкъ глаголетъ: живу азъ Аданаи Господь, яко не хощю смерти грѣшникомъ, но обратитися имъ отъ пути вашего злаго [15]. Мнози бо праведніи, не творящее по правдѣ, живущее погибаютъ [16]. Дивно же есть се, колико добра сътворилъ рустѣй земли, крестивъ ю. Мы же, крестьяне суще, не въздаемь почестья противу оного възданію. Аще бо онъ не крестилъ бы насъ, то нынѣ былѣ быхомъ въ прельсти дьяволи, яко и прародители наши погинуша (погибли). Да аще быхомъ имѣли потщаніе и молбу приносили Богу за нь, въ день преставленіа его, – вида-бы Богъ тщаніе наше к нему, прославилъ-бы и. Намъ бо достоить за нь Бога молити: понеже тѣмъ Бога познахомъ. Но даждь, Господи, по сердцю твоему, и вся прошеніа твоя исполни, иже желаше царства небеснаго; дажь ти Господи вѣнецъ с праведными, в пищи райстѣй веселіе и ликъствованіе съ Аврамомъ и с прочими патріархи; якоже Соломонъ рече: умершю мужю праведну не погибаеть упованіе [17]. Сего бо въ память держати рустіи людие, поминающее святое крещеніе, и прославляють Бога въ молитвахъ и в пѣснехъ и въ псалмѣхъ, поющее Господеви новии людие, просвѣщени Святымъ Духомъ, чающее надежи великаго Бога и Спаса нашего Ісуса Христа въздати комуждо противу трудомъ неизреченную радость, юже буди улучити (получить) всѣмъ христьяномъ.
О, святая царя, Констянтине и Володимере! Помагайта на противныя сродникомъ ваю (вашимъ), и люди избавляйта отъ всякыя бѣды, грѣческыя и рускыя, и о мнѣ грѣшнемъ помолитася къ Богу, яко имуще дерзновение къ Спасу, да спасуся ваю молитвами. Молюся и мило васъ дѣю писаніемъ грамотица сея малыя, юже, похвалю ваю, написахъ недостойнымъ умомъ и худымъ и невѣжьственымъ смысломъ. Вы же, Святая, молящеся о насъ, о людехъ своихъ, пріимѣте (пріимите) на молитву къ Богу святую ваю сыну, Бориса и Глѣба, да вси вкупѣ възможете Господа умолити, с помощью силы креста честнаго и с молитвами пресвятыя Богородица, Госпожа нашея, и съ всѣми Святыми [18].
Примѣчанія:
[1] Печатается по рукописному сборнику XVI в., принадлежавшему И. П. Сахарову.
[2] Въ подлинникѣ число дней означено буквою, которую можно принимать, какъ за: И – 8, такъ и за: Н – 50. Во всякомъ случаѣ этого извѣстія нѣтъ въ лѣтописи.
[3] См. отселѣ Лаврент. Лѣтоп. стр. 46 и слѣд. въ Полн. Собр. Русск. Лѣтоп., т. 1.
[4] Этого извѣстія такъ-же нѣтъ у лѣтописца.
[5] Т. е. перейми я.
[6] У лѣтописца: въ церкви святаго Василья. Можно теперь судить о справедливости догадки Карамзина (П. Т. Р. т. 1, примѣч. 455) касательно церкви Іакова.
[7] Въ лѣтописи не означено имя этой церкви.
[8] Въ лѣтописи нѣтъ этого извѣстія о Волосѣ.
[9] Матѳ. 5: 7.
[10] У лѣтописца: проимавше, т. е. проломавши, разобравши.
[11] Стѣнный отъ стѣнь – тѣнь.
[12] Лук. 12: 33.
[13] Вообще всего этого сравненія Кіева съ Іерусалимомъ и Владиміра съ Моѵсеемъ нѣтъ въ лѣтописи.
[14] Рим. 5: 20.
[15] Іезек. 33: 11. Текстъ приведенъ съ опущеніемъ нѣкоторыхъ словъ.
[16] Здѣсь – пропускъ (вѣроятно, произшедшій отъ переписчика), судя по тому, какъ мысль эта изложена въ лѣтописи (Полн. Собр. Русск. Лѣтоп., т. 1, стр. 56).
[17] Притч. 16: 7.
[18] Всего этого послѣдняго отдѣленія нѣтъ въ лѣтописи.
Источникъ: Три памятника Русской Духовной литературы XI вѣка: 1) Мѣсяца Июля въ 15 день. Память и похвала князю рускому Володимеру, како крестися Володимерь, и дѣти своя крести и всю землю рускую отъ коньца и до коньца, и како крестися баба Володимерова Ольга прежде Володимера. Списано Иіаковомъ мнихомъ. Господи, благослови, отче! 2) Житіе блаженаго Володимера; 3) Мѣсяца Июля въ 24 день. Сказаніе страстей и похвала о убьеніи святую мученику Бориса и Глѣба. // Журналъ «Христіанское чтеніе, издаваемое при Санктпетербургской Духовной Академіи». — 1849 г. — Часть II. — C. 328-335.
