Молитва Пресвятой Богородице
об оставлении грехов и помощи в скорбех
Творение Иоанна Евгеника, диакона, брата Марка Ефесского
ΕΥΧΗ ΕΙΣ ΤΗΝ ΥΠΕΡΑΓΙΑΝ ΘΕΟΤΟΚΟΝ
ΔΙΑ ΑΦΕΣΙΝ ΑΜΑΡΤΙΩΝ ΚΑΙ ΒΟΗΘΕΙΑΝ ΕΙΣ ΘΛΙΨΕΙΣ
Ποίημα Ιωάννου Ευγενικού, Διακόνου, αδελφού Μάρκου του Εφέσου.
Богомати Пречистая, приими моление гласа моего, яко не имам инаго приношения, ниже возмогу принести Твоему благоутробию инаго – богомудраго, преславнаго, и пребожественнаго словесе. Богомати Приснодево, Чистая и Пренепорочная, Всепречистая разумом, словом, и духом, и телесем Твоим святым, Яже чистое и пречистое Слово и Бога, Господа нашего Иисуса Христа, от Твоих преславных кровей, безплотна и безтелесна бывша, плотию облекшая, и истинно плоть человечу Ему даровавшая, и чудесно, Бога Слова ради, добродетельми всех превосходящая, по святому Его благоволению жилищем Невместимаго явльшаяся, дабы нас ради человек и нашего ради спасения преклонились на милость небеса и снизошли к мучению нашему; Богородице Всенепорочная, чистая и неблазная, нравом, житием, и словесе, чистотою всю тварь превосходящая паче, нежели может вместити разум человечь; Богородице Пренепорочная, Всехвальная, Еяже имена многообразны, препрославленны и велики, вся благодатию преозаренная, вся преосвященная, вся преосененная, Невесто Неневестная и Богомати Дево, ширшая Небес и солнца ярчайшая, все творения славою превосходящая, честнейшая Херувим и славнейшая без сравнения Серафим, Ангелов Владычице, Госпоже мира, всеблагая Царице, и преблагое вместилище единаго благоутробнаго и всеблагаго Бога. Милостивно приими сие малое и смиренное благодарение наше, Дево достопоклоняемая и всея твари Владычице. Благосклонно приими молитву раб Твоих, яко сродница еси всех человеков; ведяще немощь нашу, человеколюбивая Мати, благосклонно и милостивно на нас призираеши во благовремениих, в скорбех. Услыши мя, о сладчайшая Владычице моя, Пресвятая Богородице, богоукрашенная и благодатию Божию осененная, добродетели исполненная богоподобно, чистотою, милосердием и кротостию обладающая, о Царице, во славе небесней одесную Всемилостиваго и Всеблагаго Бога пребывающая, присно добрететельми блистающая и благодатию Святаго Духа преукрашенная несказанно; всех Владычице и всем скорая Помощнице, вся Тебе возможна суть, яко Ты еси Мати Всемогущаго Бога, всех к тебе в нужде прибегающих ободряеши, и от искушений свобождаеши, скорби облегчаеши.
Облегчи, молю, Владычице, бремя тяжкое греховное и помилуй мя грешнаго и непотребнаго раба Твоего, яко напасти житейския и искушения отовсюду мя обыдоша, слез потоком омой многая и лютая беззакония моя. Агнца Божия родшая, вземлющаго грехи мира, исцели мой ум, помыслы греховными ослепляемь, даруй сердцу моему сокрушение, и очам моим источник слез, и печаль мою на радость преложи.
Свободи мя, Владычице моя, Пресвятая Богородице, от всякия печали и от наветов лукаваго, и от нестерпимых мирских искушений, яже прилежат ми даже от юности моея, и сердце мое, присно страждущее, всякия изми муки, и от печалей утеши и исцели; о, сладчайшая Утешительнице мира, Надеждо ненадежных, Защито беззащитных, страхом Божиим и любовию души верных напояющая и от всякаго обстояния и уныния их исцеляющая, богатством милости Твоея скорби моя услади.
Доколе, Всеблагая моя Владычице, призывати на помощь буду, оставаяся неуслышан? Вопию и никтоже внемлет мне? Достойная по грехом моим приемлю, Богомати Всенепорочная, яко от склонности ко греху и навыка к беззаконию, аз всезлобным врагом присно побеждаемь и во власти его нахожусь. Возстани на моление против обстояния вражия, простри силу Твою супротив козней его лукавых. В безмятежие, и мир, и свет обрати бурю, потопляющую мя, и тьму, мя обдержащую, присно защити, и всяк помысел мой, всяко слово и дело мое ко благому деянию направляюще, всего мя освящая и озаряя, и во всем к добродетели направляя, и благую и всесвятую волю Сына Твоего и Бога моего исполняти и творити ревностно побуждая, к исполнению Его животворящих заповедей укрепляя и нерадения мя свобождая, спаси мя, Владычице моя Богородительнице, и Царствия Небеснаго моленьми Твоми удостой, да всегда прославляю Тебя, Препрославленную и Преблагословенную, во веки веков. Аминь.
