О Господѣ нашемь Исусѣ Христѣ Сыне Божии азъ худыи и многогрѣшныи, мало съмысля, покушаюся писати житие святого князя Александра, сына Ярославля, а внука Всеволожа, понеже слышах от отець своихъ, и самовидець есмь възраста его, радъ бых исповѣдалъ святое и честное и славное житие его. Но якоже Приточникъ рече: въ злохытру душю не внидеть прѣмудрость, на вышнихъ бо краих есть, посреди стезь стояше, при вратѣх же силных присѣдит. Аще и грубъ есмь умомъ, но молитвою Святыа Богородица и /л. 156 об./поспѣшениемь святого князя Александра начатокъ положю. Съи бѣ князь Александръ родися от отца милостилюбца и мужелюбца, паче же и кротка, князя великаго Ярослава и от матере Феодосии. Якоже рече Исаия пророк: тако глаголеть Господь: князя Азъ учиняю, священни бо суть, и Азъ вожю я. Во истинну бо без Божия повелѣния не бѣ княжение его, но и взоръ его паче инѣх чековекъ, и глас его акы труба в народѣ, лице же его акы лице Иосифа, иже бѣ поставилъ его египетьскыи царь втораго царя въ Египтѣ; сила же бѣ его часть от силы Самсоня; и далъ бѣ ему Богъ премудрость Соломоню, храборъство же его акы царя римскаго Еуспесиана, иже бѣ плѣнилъ всю землю Иудеискую; и нѣгде исполчися къ граду Асафату приступити, и исшедше гражане побѣдиша плъкъ его, и остася единъ и възврати к граду силу ихъ къ вратом граднымъ, и посмѣяся дружинѣ своеи и укори я, рекъ: остависте мя единого. Такоже и князь Александръ побѣжая, а не побѣдимь. И сего ради нѣкто силенъ от Западныя страны, иже нарицаются слугы Божия, от тѣх прии/л. 157./де, хотя видѣти дивныи възрастъ его. Якоже древле царица южичьская приходи к Соломону, хотящи слышати премудрость его; тако и сеи, именемъ Андрѣяшь, видѣвъ князя Александра и възвратився къ своимъ, рече: прошед страны языкъ, не видѣх таковаго ни въ царехъ царя, ни въ князехъ князя. Сеи же слышавъ король части Римьскыя, от полунощныя страны, таковое мужество князя Александра, и помысли в собѣ: поиду и плѣню землю Александрову. И събра силу велику, и наполни корабля многы полковъ своих, подвижеся в силѣ тяжцѣ, пыхая духомъ ратным, и прииде в Неву, шатаяся безумиемь: и посла с(и)лы своя, загордѣвся, в Новъгородъ къ князю Александру, глаголя: аще можеши противитися мнѣ, то сеи есмь уже зде, плѣняя землю твою. Александръ же, слышав словеса сии, разгорѣся сердцемъ и вниде в церковъ святыя Софиа и пад на колѣну пред олътаремъ, нача молитися съ слезами: Боже хвалныи, праведныи, Боже великыи, крѣпкыи, Боже превѣчныи, основавыи землю и положивы(и) предѣлы языком, повелѣжити не прѣ/л. 157 об./ступающе в чюжую часть. Въсприимъ же пророческую пѣснь, рече: суди, Господи, обидящим мя и возбрани борющимся со мною; приими оружие и щитъ, стани в помощь мнѣ. И скончавъ молитву, въставъ, поклонися архиепископу. Епископъ же бѣ тогда Спиридонъ, благослови его и отпусти. Он же изшед ис церкви, утеръ слезы, нача крѣпити дружину свою, глаголя: не в силах Богъ, но въ правдѣ; помянемъ Пѣснотворца, иже рече: сии въ оружии, а си(и) на конѣх, мы же во имя Господа Бога нашего призовемь; тии спяти быша и падоша, мы же стахом и прости быхом. Сии рѣк, поиде на нихъ в малѣ дружинѣ, не съждався съ многою силою своею, но уповая на Святую Троицу. Жалостно же бѣ слышати, яко отець его князь великыи Ярославъ не бѣ вѣдал таковаго въстания на сына своего милаго Александра, ни оному бысть когда послати вѣсть къ отцю своему, уже бо ратнии приближишася; тѣмже и мнози новгородци не совокупилися бѣшя, поне же ускори князь поити. И поиде на ня въ день въскресениа, иуля въ 15, имѣяше же вѣру велику къ святыма мученикома Бо/л. 158./рису и Глѣбу. И бѣ нѣкто мужь старѣишина в земли Ижерстеи, именемъ Пелугии, поручено же бысть ему стража нощная морская; въсприя же святое крещение, и живяше посреди рода своего, погана суща, наречено же бысть имя его въ святѣмъ крѣщении Филипъ. И живяше богоугодно, в среду и в пяток пребываше въ алчбѣ; тѣмже сподоби его Богъ видѣти видѣние страшно в тъи день. Скажемъ вкратцѣ. Увѣдавъ силу ратных, иде противу князя Александра, да скажеть ему станы. Стоящю же ему при краи моря, и стрежаше обою пути, и пребысть всю нощь въ бдѣнии, и якоже нача въсходити солнце, слыша шюмъ страшенъ по морю, и видѣ насадъ единъ гребущь по морю; и посреди насада стояща святая мученика Бориса и Глѣбъ въ одеждах чръвленых, и бѣста рукы дръжаща на рамѣх, гребци же сѣдяху акы мглою одѣани; рече Борисъ: брате Глѣбе, вели грести, да поможемь сроднику своему князю Александру. Видѣв же таковое видѣние и слышавъ таковыи глас от мученику, стояше трепетенъ, дондеже /л. 158 об./ насадъ отъиде от оочию его; по томъ скоро поеде [1] Александръ, и [2] радостныма оочима, исповѣда ему единому видѣние; князь же рече ему: сего не рци никомуже. Оттолѣ потщався наеха на ня въ 6 день, и бысть сѣча велика над Римляны, и изби их множество бесчислено, и самому королю възложи печать на лице острымь своимь копиемь; останокъ же их побѣже, и трупиа мертвых своих наметаша корабля [3], и потопиша в мори. Князь же Александръ возвратися с побѣдою, хваля и славя имя своего Творца.
Приидоша пакы от Западныя страны и возградиша град въ отечьствѣ Александровѣ; князь же Александръ воскорѣ иде и изверже град их из основания, а самых извѣша, и овѣх с собою поведе, а инѣх помиловавъ отпусти, бѣ бо милостивъ паче мѣры.
По побѣдѣ же Александровѣ, якоже побѣди корабля, в третии год, в зимнее время поиде на землю Немецкую в велицѣ силѣ, да не похвалятся ркуще: укоримъ Словеньскыи языкъ ниже себе; уже бо бяше град Псков взят, и намѣстникы /л. 159./ от Немець посажени. Он же въскорѣ градъ Псковъ изгна и Немець изсѣче, а инѣх повяза, и град свободи от безбожных Немець, а землю их повоева и пожже и полона взя бес числа, а овѣх иссече. Они же гордии совокупишася и рекоша: поидемъ и побѣдим Александра и имемъ его рукама. Егда же приближишася, и очютиша я стражие, князь же Александръ оплъчися, и поидоша противу себе и покриша озеро Чюдьское обои от множества воои. Отець же его Ярославъ прислалъ бѣ ему брата меньшаго Андрѣя на помощь въ множествѣ дружинѣ. Такоже и у князя Александра множество храбрых, якоже древле у Давыда царя силнии, крѣпции, тако и мужи Александровы исполнишася духом ратнымъ; бяху бо сердца их акы сердца лвомъ, и рѣшя: о княже нашь честныи, нынѣ приспѣ врѣмя нам положити главы своя за тя. Князь же Александръ, воздѣвъ руцѣ на небо и рече: суди ми, Боже, и разсу(ди) прю мою от языка непреподобна; и помози ми, господи, яко же древле Моисию на Амалика и прадѣду нашему Ярославу на окааннаго Святополка. Бѣ же тогда субота, /л. 159 об./ въсходящю солнцю, и съступишася обои: и бысть сѣча зла и трусъ от копии ломления и звукъ от сѣчения мечнаго, якоже и езеру померзъшю двигнутися, и не бѣ видѣти леду, покры бо ся кровию. Се же слышах от самовидца, иже рече ми: яко видѣх полкъ Божии на въздусѣ, пришедши на помощь Александрови. И тако побѣди я помощию Божиею, и даша плеща своя, и сѣчахуть я гоняще аки по и аеру, и не бѣ камо утещи. Зде же прослави Богъ Александра пред всѣми полкы, яко же Исуса Наввина у Ерехона. А иже рече: имемь Александра руками, сего дасть ему Богъ в руцѣ его; и не обрѣтеся противникъ ему въ брани никогдаже. И возвратися князь Александръ с побѣдою славною, и бяше множество полоненых в полку его, и ведяхуть босы подле конии, иже именують себе Божии ритори. И якоже приближися князь къ граду Пскову, игумени же и попове и весь народ срѣтоша ѝ пред градомъ съ кресты, подающе хвалу Богови и славу господину князю Александру, поюще пѣснь: пособивыи, Господи, кроткому Давыду побѣдити иноплеменьникы вѣрному /л. 160./ князю нашему оружиемь крестны(м) и свободи градъ Псков от иноязычникъ рукою Александровою. И рече Александръ: о невѣгласи псковичи, аще сего забудете и до правнучатъ Александровых, и уподобитеся Жидом, ихже препита Господь в поустыни манною и крастелми печеными, и сихъ всѣх забыша и Бога своего, изведшаго я от работы изь Египта.
И нача слыти имя его по всѣмь странамъ, и до моря Хонужьскаго, и до горъ Араратьскых, и об ону стра(ну) моря Варяжьскаго, и до великаго Риму.
В то же время умножися языка Литовьскаго, и начаша пакостити волости Александрове; он же, выездя, и избиваше я. Единою ключися ему выехати, и побѣди 7 ратии единѣмъ выездомъ, и множество князеи их изби, а овѣх рукама изыма; слугы же его, ругающеся, вязахуть их къ хвостомъ конеи своихъ; и начаша оттолѣ блюсти(ся) имени его.
В то же время бѣ царь силенъ [4] на Въсточнѣи странѣ, иже бѣ ему Богъ покорилъ языкы многы, от въстока даже и до запада; тъи же царь, слышавъ Александра тако славна и храбра, посла к нему послы и рече: Александре, вѣси ли, яко Богъ покори ми мно/л. 160 об./гыя языкы; ты ли един не хощеши покорити ми ся; но аще хощеши съблюсти землю свою, то приеди скоро къ мнѣ и видиши честь царства моего. Князь же Александръ прииде в Володимеръ по умертвии отца своего, в силѣ велицѣ; и бысть грозенъ приездъ его, и промчеся вѣсть его и до устья Волгы. И начаша жены моавитьскыя полошати дѣти своя, ркуще: Александръ едет. Съдумав же князь Александръ, и благослови его епископъ Кирилъ, и поиде к цареви въ Орду. И видѣвъ его царь Батыи, и подивися и рече велможамъ своимъ: истинну ми сказасте, яко нѣсть подобна сему князя; почьстивъ же ѝ честно, отпусти ѝ.
По сем же разгнѣвася царь Батыи на брата его меншаго Андрѣя, и посла воеводу своего Неврюня повоевати землю Суждальскую. По плѣнении же Неврюневѣ князь великыи Александръ церкви въздвигну, грады испольни, люди распуженыа събра в домы своя. О таковых бо рече Исаиа пророкъ: князь благъ въ странах, тих, увѣтливъ, кротокъ, съмѣренъ, по образу Божию есть, не внимая богатьства и не презря кровъ праведничю, сиротѣ и /л. 161./ вдовици въ правду судяи, милостилюбець, благъ домочадцемь своимъ, и вънѣшнимъ от странъ приходящимь кормитель. На таковыя Богъ призирает, Богъ бо не ангеломъ любит, но человекомъ сии щедря ущедряеть и показываеть на мирѣ милость свою. Распространи же Богъ землю его богатьствомъ и славою, и удолъжи Богъ лѣт ему.
Нѣкогда же приидоша къ нему послы от папы из великого Рима, ркуще: папа нашь тако глаголет: слышахом тя князя честна и дивна, и земля твоя велика, сего ради прислахом к тобѣ от двоюнадесятъ кординалу два хытреша [5], Агалдада и Гѣмонта, да послушаеши учения ихъ о законѣ Божии. Князь же Александръ, здумавъ съ мудреци своими, въсписа к нему и рече: от Адама до потопа, от патопа до разделения языкъ, от разьмѣшениа языкъ до начяла Авраамля, от Авраама до проитиа Иисраиля сквозе море, от исхода сыновъ Иисраилевъ до умертвия Давыда царя, от начала царства Соломоня до Августа и до Христова Рожества, от Рожества Христова до страсти и воскресения, от въскресения же Его и на небеса възшествиа и до царства Кон/л. 161 об./стантинова, от начала царства Костянтинова до перваго збора и седмаго, сии вся добрѣ съвѣдаемь, а от вас учения не приемлем. Они же възвратишася въсвояси. И умножишася дни живота его в велицѣ славѣ. Бѣ бо иерѣелюбець и мьнихолюбець, и нищая любя, митрополита же и епископы чтяше и послушааше их, аки самого Христа. Бѣ же тогда нужда велика от иноплеменникъ, и гоняхуть християнъ веляще с собою воиньствовати; князь же великыи Александръ поиде к цареви, дабы отмолити людии от бѣды тоя. А сына своего Дмитрия посла на Западныя страны, и вся полъкы своя посла с нимъ, и ближних своих домочадець, рекши к ним: служите сынови моему, акы самому мнѣ всѣмь животомъ своимъ.
Поиде князь Димитрии в силѣ велицѣ и плѣни землю Нѣмецкую, и взя град Юрьевъ, и възвратися к Новугороду съ многымъ полоном и с великою корыстию. Отець же его князь великыи Александръ възвратися из Орды от царя, и доиде Новагорода Нижняго и ту пребывъ мало здрав и, дошед Городца, разболѣся. О горѣ тобѣ, бѣдныи человече, како мо/л. 162./жеши написати кончину господина своего, како не упадета ти зѣници вкупѣ съ слезами, како же не урвется сердце твое от корения; отца бо оставити человекъ может, а добра господина не мощно оставити, аще бы лзѣ и въ гробъ бы лѣзлъ с ним. Пострада же Богови крѣпко, остави же земное царство и бысть мних; бѣ бо желание его паче мѣры ангельскаго образа, сподоби же его Богъ и болшии чин приати, скиму. И так Богови духъ свои предасть с миромъ, месяца ноября въ 14 день, на память святого апостола Филиппа. Митрополит же Кирилъ глаголаше: чада моя разумѣите, яко уже заиде солнце Суздальскои [6]. Иерѣи и диякони, черноризци, нищии и богатии и вси людие глаголааху: уже погыбаемь. Святое же тѣло его понесоша къ граду Володимерю; митрополитъ же, князи и бояре и весь народ, малии, велиции, срѣтоша ѝ въ Боголюбивѣмъ съ свѣщами и с кандилы; народи же съгнатахутся, хотяще прикоснутися честнѣмь одрѣ святого тѣла его; бысть же вопль и кричание и туга, яка же нѣсть была, яко и земли потрястися. Положено же бысть тѣло его въ Рожестве Святыя Богородица, въ архимандритьи велицѣи, /л. 162 об./ месяца ноябриа въ 24, на память святого отца Амфилохия. Бысть же тогда чюдо дивно и памяти достоино: егда убо положено бысть святое тѣло его в раку, тогда Савастиян икономъ и Кирилъ митрополит хотя розьяти ему руку, да вложат ему грамоту душевную, он же, акы живъ сущи, распростеръ руку свою и взят грамоту от рукы митрополита; и приятъ же я ужасть и одва отступиша от ракы его. Се же бысть слышано всѣмъ от господина митрополита и от иконома его Савастияна. Кто не удивится о семъ, яко тѣлу бездушну сущю и везому от далних градъ в зимное время; и тако прослави Богъ угодника своего.
Примѣчанiя:
[1] Въ Новгородской 1-й лѣтописи младшаго извода: поиде. Въ Лаврентьевской лѣтописи: приѣха.
[2] Здѣсь пропускъ. Въ Новгородской 1-й лѣтописи: видѣвъ его радосныма очима.
[3] Въ Новгородской 1-й лѣтописи: корабля 3.
[4] На полѣ написано: Батыи.
[5] В лѣтописной редакцiи житiя по Румянцевскому списку № 1772: хитрѣишаа (См. Чт. в Общ. ист. и древн. росс, 1915, кн. III, тексты, 117).
[6] В рукописи пропущено слово: земли.
Печатается по изданiю: Полное собрание Русских Летописей. Том V. Выпуск 2: Псковские летописи. / Под редакцией А. Н. Насонова. – М. Издательство Академии Наук СССР, 1955 – с. 11-16.
