Русская Православная Церковь

ПРАВОСЛАВНЫЙ АПОЛОГЕТ
Богословский комментарий на некоторые современные
непростые вопросы вероучения.

«Никогда, о человек, то, что относится к Церкви,
не исправляется через компромиссы:
нет ничего среднего между истиной и ложью.»

Свт. Марк Эфесский


Интернет-содружество преподавателей и студентов православных духовных учебных заведений, монашествующих и мирян, ищущих чистоты православной веры.


Карта сайта

Разделы сайта

Православный журнал «Благодатный Огонь»
Церковная-жизнь.рф

Сказаніе преп. Нестора о житіи и убіеніи благовѣрныхъ князей Бориса и Глѣба.
 

Сказаніе это уже давно извѣстно ученымъ изслѣдователямъ нашей древней духовной письменности. Оно признано произведеніемъ, и притомъ самымъ первымъ, по времени, преподобнаго Нестора [1]. Въ старинныхъ рукописяхъ оно встрѣчается въ сборникахъ разныхъ сочиненій и житій святыхъ, также въ мѣсячныхъ и четьи-минеяхъ, подъ 2-мъ числомъ мѣсяца мая, когда празднуется открытіе мощей св. мучениковъ, и подъ 24-мъ числомъ мѣсяца іюля, когда воспоминается мученическая кончина св. Бориса [2], подъ такимъ заглавіемъ: «Чтеніе о житіи и о погубленіи блаженную страстотръпицу Бориса и Глѣба». Въ бóльшей части списковъ это чтеніе оканчивается разсказомъ о погребеніи св. Глѣба въ Вышгородѣ, подлѣ св. Бориса; но о составителѣ его въ нихъ вовсе не упоминается. Въ нѣкоторыхъ же спискахъ послѣ разсказа о погребеніи св. Глѣба слѣдуетъ еще такое прибавленіе: «се же азъ списахъ грѣшный о житіи и о погубленіи блаженную страстотръпицу Бориса и Глѣба. но аще Богу велящу то, и чюдесъ его мало нѣчто исповѣмы…» и проч.; и въ слѣдъ за этимъ прибавленіемъ помѣщается отдѣльное сказаніе объ открытіи мощей и чудесахъ св. мучениковъ, въ заключеніи котораго имя списателя обоихъ сказаній выставляется въ слѣдующихъ словахъ: «се же азъ Нестеръ грѣшный о житіи и о погубленіи и о чюдесѣхъ святою и блаженною страстотрьпцю сею опаснѣ вѣдущихъ и списавъ я другая самъ свѣды отъ многихъ мало въписахъ, да почитающе славятъ Бога…» [3]. Такимъ образомъ упомянутое сказаніе представляется однимъ изъ двухъ отдѣльныхъ сочиненій Нестора о св. мученикахъ, изъ которыхъ въ одномъ разсказывается о житіи и убіеніи св. Бориса и Глѣба, а въ другомъ — объ открытіи мощей ихъ и о чудесахъ. — Сравнивая сказаніе Нестора съ тѣми извѣстіями о св. мученикахъ, которыя находятся въ его лѣтописи, и съ другимъ сказаніемъ о житіи ихъ, которое приписывается Іакову мниху, мы не встрѣчаемъ въ немъ нѣкоторыхь, извѣстныхъ изъ сихъ сочиненій, подробностей; въ немъ, напримѣръ, не упоминаются имена лицъ окружавшихъ св. мучениковъ, а равно и убійцъ ихъ; не названы мѣста, гдѣ случились разсказываемыя событія; не упомянуто даже, въ какой области княжилъ св. Борисъ, а о св. Глѣбѣ сказано, что онъ не имѣлъ никакой области, и отъ преслѣдованія Святополка бѣжалъ въ полуночныя страны, чтó не согласно съ лѣтописью; не согласно также съ лѣтописью означено время крещеніа Владиміра и всей Руси въ 982 г. Но вмѣсто опущенныхъ подробностей въ сказаніи разсказываются другія обстоятельства, о которыхъ не упомянуто въ лѣтописи, и вообще разсказъ о характерѣ св. братьевъ и ихъ мученической кончинѣ написанъ гораздо подробнѣе, а въ началѣ помѣщено длинное вступленіе, въ которомъ гаворится о сотвореніи, паденіи и искупленіи человѣка, о распространеніи Христовой вѣры по всѣмъ странамъ, и наконецъ въ землѣ Русской.

Встрѣтивъ между рукописями Соловецкой библіотеки очень хорошій, хотя и не очень древній списокъ [4] сказанія Нестора о св. мученикахъ, мы рѣшились его здѣсь напечатать [5]. Важность этого сочиненія, какъ древнѣйшаго памятника нашей духовной письменности, признана всѣми. Мы съ своей стороны считаемъ умѣстнымъ здѣсь указать только на то значеніе, какое оно имѣло у нашихъ предковъ и какое можетъ имѣть въ настоящее время, именно какъ на предметъ глубоко занимательнаго и поучительнаго чтенія. Жизнь св. Бориса и Глѣба, какъ первенствующихъ вѣнценосныхъ членовъ нашей Церкви и вмѣстѣ первыхъ ея мучениковъ, трогательная сама по себѣ, еще трогательнѣе является въ прекрасномъ разсказѣ Нестора. Онъ соединяетъ этотъ разсказъ съ разсказомъ о самыхъ первыхъ временахъ Христіанства въ Россіи, изъ которыхъ лица св. мучениковъ выступаютъ въ особенномъ свѣтѣ, какъ «двѣ звѣздѣ свѣтлѣ, свѣтящася посредѣ темныхъ». Съ особенною любовію Несторъ изображаетъ сихъ святыхъ братьевъ, любимыхъ сыновей св. Владиміра, проникнутыхъ пламенною любовію къ Богу, вмѣстѣ читающихъ постоянно житія и описанія мученій святыхъ и со слезами молящихся о томъ, чтобы Богъ сподобилъ ихъ тойже участи: ихъ молитва услышана, и неразлучные при жизни, они не разлучаются и по смерти. Еще поразительнѣе становится для насъ ихъ свѣтлый образъ, когда рядомъ подлѣ него мы встрѣчаемъ мрачный образъ ихъ убійцы, Святополка окаяннаго, проникнутаго ненавистію къ своимъ братьямъ, и сдѣлавшагося, по выраженію Нестора, вторымъ Каиномъ, въ первый разъ обагрившимъ неповинною кровію новопросвѣщенную землю Русскую. 
 


 

Мѣсяца Маия 2 день. 
Чтеніе о житіи и о погубленіи блаженную страстотръпицу Бориса и Глѣба
 [6].

Владыко Господи Вседръжителю. сътворивыи небо и землю и вся яже на неи. Ты и нынѣ Владыко призри на смиреніе наше. и даиже разумъ сердцю моему. да исповѣмъ окаанныи азъ всѣмъ послушающихъ житіа и мученіа святую страстотръпцу Бориса и Глѣба. но о Владыко вѣси грубость и неразуміе сердца моего. но надѣюся Твоему милосердію и молитвы ради святую мученику. елико слышахъ отъ нѣкыхъ христолюбець. то да исповѣдаю. но послушаите братіе и незазрите грубости моеи.

Искони бо рече. сътвори Богъ небо и землю и вся яже на неи. и насади на востоцѣ породу [7] и създа человѣка своима рукама. и дуну на лице его и бысть въ душю живу. и вземъ ребро отъ него и созда жену ему. и заповѣда има отъ всего сада ясти. толко единаго древа не ясти. иже разумѣти добро и зло. рече бо Господь. вонже день снѣста отъ него смертію да умрета. искониже ненавидяи добра діяволъ иже бѣ реклъ да сътворю престолъ свои на звѣздахъ. и за то сриновенъ бысть на землю. тоже якоже преже рѣхъ ненавистникъ діяволъ. преже увѣда еже заповѣда Богъ Адамови. вземъ отъ древа дасть женѣ его. онаже вкушьши подасть Адаму. и оба преступиста заповѣдь Божію. и того ради изгнанъ бысть изъ рая. и зачатъ жена его Евга и роди Каина. и пакы приложи и роди Авеля. но да не продолжу рѣчи. но въскорѣ извѣщаю. умножьшимъ бо ся человѣкомъ по всеи земли. и видѣвъ ненавидяи рода человѣчя діяволъ умноженіа человѣкъ. сътвори имъ кланятися идоломъ а не Богу сътворшему небо и землю.

Благыи же Богъ долготръпя и ожидая покааніа ихъ. посла къ нимъ святыя своя пророкы. ониже ни тѣхъ послушаша но и тѣмъ досадиша. и другыя отъ нихъ побиша. и то имъ творящимъ ни ту ся Богъ прогнѣва на създаніе Свое. но милосердоваше о твари Своей. изволися милосердіемъ Его. и пусти Сына Своего единочадаго. иже сшедъ съ небесѣ вселися въ Святую Дѣвицю. и рожься отъ нея дѣвьства же не вредивъ. якоже бѣ преже рожества Дѣвою. такоже и по рожествѣ пребысть Дѣвою. таже Господу нашему Ісусу Христу. якоже преже рекохомъ. рожьшюся отъ Святыа Дѣвица. и крещьшюся отъ Іоанна. намъ образъ давъ. да и мы крестимся во имя Его. таче потомъ избра 12 ученика. яже и апостолы нарече. и много учаше о Царствѣ Небеснѣмъ сказаше имъ многажды же и чюдеса предъ ними сътвори и предъ всѣмъ народомъ. якоже и святое еѵангеліе глаголеть. и посемъ смерти вкуси волею страстію своею. и положенъ бысть въ гробѣ и сниде на ада. и дръжаву его разруши самогоже связа. и дръжимая имъ свободи душа. и глагола имъ. идѣте въ раи. они же радующеся идоша хваляще Бога. самъ же въ 3 и день въскресе отъ мертвыхъ и явися ученикомъ своимъ и глагола имъ. проповѣдаите еѵангеліе по всеи земли. всь иже вѣруетъ и крестится и спасенъ будеть. а иже вѣры не имѣть осудится въ муку вѣчную [8] и по глаголѣхъ сихъ възнесеся на небо и сѣде одесную Бога и Отца. апостолиже видѣвше проповѣдаша еѵангеліе по всей земли. якоже заповѣда имъ Богъ. и мнози вѣроваша и крестишася во имя Отца и Сына и Святаго Духа. и бѣ радость велика вѣровавшимъ въ Господа нашего Ісуса Христа. слѣпіи прозираху. хроміи хожаху. прокаженіи очищахуся. бѣси отъ человѣкъ отгоними бываху молитвами святыхъ апостолъ. и умножьшимся христіяномъ. и требы идольскыя разоришася и погибоша.

И симъ сице бывшимъ остаже земля Руская и страна въ первіи прельсти идольстіи. не убо бѣ ни отъ когоже слышали слова о Господѣ нашемъ Ісусѣ Христѣ. не бѣша бо ни апостоли заходили къ нимъ. и никтоже имъ проповѣдалъ бѣ слова Божія. но егда Самъ Владыка нашъ Господь Ісусъ Христосъ своею благостію призрѣвъ на всю свою тварь. не дасть бо имъ погибнути въ прельсти идольстіи. но по мнозѣхъ лѣтѣхъ милосердова о своемъ създаніи хотя я въ послѣдняа дни присвоити къ своему божеству. якоже и самъ глаголаше въ еѵангеліи притчами рекыи [9]. подобно есть Царство Божіе человѣку. иже изиде по утреніи наятъ дѣлателя въ виноградъ свои. и обрѣтъ я посла. да дѣлають въ виноградѣ его. и обѣщавъ по сребренику дати. и пакы изиде въ 3 часъ и обрѣте другыа праздны сѣдаща. и глагола имъ. идѣте въ виноградъ мои и дѣлаите. и еже будеть правда то и възмете. такоже и въ 6 часъ. и въ 9. изидеже и въ 11 часъ. и обрѣте ины сѣдяща праздны. и глагола имъ что праздни есте. ониже глаголаша ему. всь день сѣдохомъ и никтоже насъ не наятъ. и рече имъ. идѣте въ виноградъ мои и дѣлаите. и еже будеть вы право. то да възмете. иже Господь прозря о сихъ притчю изрече. по истинѣ бо си праздни быша служаще идоломъ. а не живу Богу. иже сътвори небо и землю. и вся лѣта своя ижжиша въ прельсти идольстіи. не бѣ бо никтоже приходилъ къ нимъ. иже бы благовѣстилъ о Господѣ нашемъ Ісусѣ Христѣ. но егда благоволи небесныи Владыка. яко же преже рекохомъ. въ послѣдняа дни милосердова о нихъ. и не дасть имъ погыбнути до конца въ прельсти идольстіи.

Бысть бо рече князь въ тыи годы владыи всею землею Рускою. именемъ Владимиръ. бѣже мужъ праведенъ и милостивъ къ нищимъ и къ сиротамъ и вдовицамъ. еллинъ же вѣрою. и сему Богъ спону [10] нѣкаку наведъ и сътвори быти ему крестьяну. якоже древле Плакидѣ. бѣ бо Плакида мужъ праведенъ и милостивъ. еллинъ же вѣрою якоже въ житіи его пишется. но егда видѣ явившуся ему крестъ Господа нашего Ісуса Христа. тогда падъ поклонися Ему глаголя. Господи кто Ты еси. что велиши рабу Твоему. Господь рече къ нему. Азъ есмь Ісусъ Христосъ. егоже ты гониши. но иди и крестися во имя Отца и Сына и Святаго Духа. онъже ту абіе поимъ жену свою и два дѣтища своя и крестися. и наречено бысть имя ему Еѳустафѣи. такоже и сему Владимиру явленіе Божіе быти ему крестьяну сътвори. емуже наречено быстъ имя Василіи. таче потомъ всѣмъ заповѣда велможамъ своимъ и всѣмъ людямъ. да ся крестять во имя Отца и Сына и Святаго Духа.

Слышите чюдо исполнено благодати. како вчера заповѣда всѣмъ требу принести идоломъ. а днесь повелѣваетъ креститися во имя Отца и Сына и Святаго Духа. вчера не вѣдяше. кто есть Ісусъ Христосъ. днесь проповѣдатель Его явися. вчера еллинъ Владимиръ нарицашеся. а днесь крестьянъ нарицается Василіи. се вторыи Костянтинъ въ Руси явися. но и се чюднѣе. заповѣда бо изшедши. якоже преже рекохомъ. всѣмъ креститися. и всѣмъ грядущимъ ко крещенію. ни бо единому супротивящуся. ни въпрекы глаголющу. но яко издавна научени тако течаху радующеся къ крещенію. радовашеся князь Владимиръ видя ихъ теплую вѣру. юже имяху къ Господу нашему Ісусу Христу. се бысть въ лѣто 6490 [982]. потомъ же създа Владимиръ церковь Пречистыя Владычица нашея Богородица въ Кіевѣ.

Таче сынове быша мнозѣ у Володимера. въ нихже бѣяста святая сія Борисъ и Глѣбъ. о нихъже и повѣсть сія есть. тако свѣтящася акы двѣ звѣздѣ свѣтлѣ посредѣ темныхъ. пусти же благовѣрныи князь сыны своя кождо на свою область. якоже далъ имъ самъ. а святаго Бориса и Глѣба у себе дръжаше, занеже единаче дѣтьска бѣста [11]. бѣже Глѣбъ вельми дѣтескъ. а блаженныи Борисъ въ разумѣ уже сыи. исполнь благодати Божіа. взимаше бо книгы и чтяше житіа и мученіа святыхъ. бяше бо грамотѣ ученъ. и глаголаше со слезами моляся. Владыко мои Ісусе Христе. сподоби мя яко единого отъ тѣхъ и даруи ми по стопамъ ихъ ходити. Господи Боже мои. да не възнесется мысль моя суетою мира сего. но просвѣти сердце мое на разумъ заповѣдіи Твоихъ. и даруи ми даръ. егоже дарова отъ вѣка угодившимъ Ти. Ты еси Царь и Богъ истинныи. иже помиловавыи ны. и изведъ отъ тьмы къ свѣту, Тебѣ бо есть слава во вѣкы аминь.

Сице же ему молящуся по многы часы. а святыи Глѣбъ послушаше его сѣдя и не отлучашеся его день и ночь. бяше бо якоже рекохомъ дѣтескъ а умомъ старъ. многу же милостыню творяше нищимъ и вдовицамъ и сиротамъ. бѣ бо и отецъ его тако милостивъ Владимиръ. яко и на возилехъ возити брашно по граду и овощь и медъ и вино испроста рещи все. еже на потребу болящимъ и нищимъ. а проповѣднику глаголющу съ въпрашаніемъ. егда гдѣ кто болитъ. си же видяща и блажащая отца тако творяща боле утвержаетася на милостыню. любляше же отець ею. видя благодать Божію на нихъ.

Бяше же блаженному Борису сътворено имя въ крещеніи Романъ. якоже бо и на первѣмъ Романѣ почиваше Духъ Святыи измлада. такоже и на семъ Божіа бѣ благодать. бѣ бо рече святому Роману молящуся Святѣи Владычицѣ нашеи Богородици. и мало ему уснувшу. явися ему Мати Божіа имущи въ руку своею свитокъ. иже и подасть святому. и яко взять ѝ. и се ненавидѣй добра діяволъ текъ въсхвати ѝ. и пакы Мати Божія взятъ свитокъ и подасть святому Роману. онъ же въставъ отъ сна тако видѣся полнъ Святаго Духа. такоже и сіи Романъ блаженныи. видя бо врагъ давую ему благодать отъ Бога и милосердіе ко всѣмъ. и не терпя того врагъ влѣзе въ брата его старѣишаго въ Святополка. хотя тѣмъ въсхватита животъ его отъ земля. яко се помалу скажемъ.

Святому же Глѣбовѣ сътворено имя Давыдъ. видѣши ли благодать Божію измлада на дѣтищи. сътвориша бо рече имя ему Давыдъ. како или кымъ образомъ. не имъ же ли онъ Давыдъ царь меншіи бѣ въ братіи своеи. такоже и сіи святыи мнѣи бѣ въ братіи своеи и унѣи въ дому отца своего. и пакы яко пророкъ Давыдъ изиде противу иноплеменникомъ и отъя поношеніе отъ сыновъ израилевыхъ. такоже и сіи святыи Давыдъ изиде противу супостату діяволу и погуби ѝ. и отьятъ поношеніе отъ сыновъ рускыхъ. но се уже възвратимся на первую повѣсть.

Благовѣрныи же князь Владимиръ видя блаженнаго Бориса приспѣвша верстою [12] въсхотѣ бракъ сътворити ему. блаженныи же худѣ рачаше о томъ. но умоленъ бывъ отъ бояръ. да не ослушается отца но створитъ его волю. се же блаженныи сътвори не похотѣ ради телесныа. не буди то. но за нарядъ царскаго и послушаніа отцева, таче потомъ посла ѝ отець на область. а святаго Глѣба у себе остави. единацѣ бо бѣста уна [13] тѣломъ. блаженныи же Борисъ много показа милосердіе въ области своей. не точію же къ убогымъ но и всѣмъ людемъ. якоже и всѣмъ чюдитися о милсердіи его и о кротости. бѣ бо блаженный кротокъ и смиренъ. не тръпя же того врагъ. якоже рекохомъ преже. вниде въ сердце брату его. емуже имя Святополкъ. нача мыслити на праведнаго. хотяше бо окаанныи всю страну погубити и владѣти единъ. тѣмъже мысляше хотя блаженнаго Бориса погубити. но не попусти ему Богъ тогды. но егда самъ въсхотѣ. увѣдавъ же то благовѣрныи отець ихъ Владимиръ. пославъ приведе къ себѣ блаженнаго Бориса. блюдыи да не како прольеть кровь его. онъ же болми разгнѣвася на блаженнаго. мня окаянный. яко тъи хощетъ по смерти отца столъ пріати. сице бо бѣ при Осифѣ прекрасномъ. бѣ бо рече любяи Іаковъ Осифа и Веньямина. бяста бо уна тѣломъ. и сего ради братья гнѣвахуся на него. глаголаху бо. яко Осифъ хощетъ надъ нами царствовати. якоже и бысть. такоже и здѣ сбысться. не токмо же на блаженнаго Бориса гнѣвашеся но и на блаженнаго Глѣба. си же того не вѣдяста. но пребыста въ поученіихъ Божіихъ словесехъ. милостыню же творяща нищимъ и убогымъ и вдовицамъ. якоже не имѣти има у себе ничтоже развѣ одежа.

По времени же нѣкоемъ нача болѣти благовѣрныи князь Владимиръ отець има болѣзнію. еюже и умре. болящу же ему въ страну его придоша ратніи. слышавъ же князь и не могыи изити противу имъ. посла сына своего блаженнаго Бориса. давъ ему множество вои. блаженныи же падъ поклонися отцу своему и облобыза честнѣи его нозѣ. и пакы въставъ объемь выю его. цѣловаше съ слезами. ти тако изиде съ вои на ратныа. и отшедшу же блаженному умре отець его благовѣрныи князь Володимиръ въ лѣто 6525 [1017].

Тоже увѣдавъ окаанныи сынъ его Святополкъ акы радуяся отни [14] смерти. и всѣдъ на конь скоро доиде Кіева града и сѣде на столѣ отца своего. изволи волю желаніе сердца своего на блаженнаго Бориса мышляше. како или кымъ образомъ погубити ѝ. увѣдавъ же то святыи Глѣбъ восхотѣ бѣжати на полунощныа страны. сущу тамо иному брату и рекъ. егда како погубятъ мя. хотяше же отъити. иде первѣе въ церковь Святыа Богородица. и падъ посредѣ церквѣ моляшеся сице. Господи Боже мои Ісусе Христе егоже ради вся быша. яко Ты еси помощникъ на тя уповающымъ. вонми убо и виждь. что сътворити хотять рабу Твоему Борису а моему брату. Ты бо еси свѣдыи вся. но аще и мене осудилъ еси убіену быти въ градѣ семъ. не имамъ бѣжати строеніа Твоего. аще ли же ни. буди съ мною во всякомъ пути и не остави мене въ смерть. яко Ты еси Спасъ и Тебѣ слава въ вѣкы аминъ.

Сице же моляся святыи Глѣбъ. и въставъ отъ земля иде къ иконѣ Святыя Богородица. и падъ поклонися съ слезами и цѣловавъ образъ Святыа Богородица. ти тако изиде изъ церкви иде къ рѣцѣ. идѣже бѣ кораблецъ уготованъ и влѣзъ вонь. ти тако отбѣжа отъ законопреступнаго брата. блаженный же Борисъ якоже рекохомъ отшелъ бѣ съ вои ратныа и невѣдяше того всего. ратніи же услышаша блаженнаго Бориса идуща съ вои побѣгоша недерзнувше стати противу блаженному. тачеже блаженныи Борисъ шедъ умири грады вся и възвратися вспять. идущу же ему повѣдаша ту отца его умертвіе а брата старѣишаго Святополка сѣдша на столѣ отнѣ. блаженныи же яко услыша отца умерша возрѣвъ на небо помолися. Владыко Господи Ісусе Христе. покоивыи вся святыя отца угодившая Тебѣ Богу истинному. Ты и нынѣ покои Господи душу раба Своего отца моего Василія съ всѣми праведными съ Авраамомъ Исакомъ и Яковомъ. яко Ты еси покои всѣмъ уповающимъ на Тя.

Слышавъ же пакы. яко Святополкъ сѣдитъ на столѣ отца. възрадовася рекыи. съи [15] ми будетъ яко и отець. и идяше путемъ своимъ яко овця незлобиво. не помышляше никоего же зла на брата своего. бѣже не милосердыи тыи послалъ съ лестію къ блаженному Борису. хотя слышати отъ него глаголанная. но ни тако обратися на милосердіе брату своему. но помышляше. како или кымъ образомъ погубиті ѝ. видѣте ли братіе не милосердіе окааннаго Святополка. втораго Каина явившагося. мыслящу убо Каину рече. како или кымъ образомъ погубить брата своего Авеля. не бяше бо тогды видѣти кымъ образомъ смерть бываеть. и се яви ему злодѣи діяволъ въ нощь спящу убіиство. въставь же отъ сна уби брата своего Авеля. такоже и сему Святополку томуже подобно. вложи ему врагъ въ сердце. да послеть и погубить брата своего Бориса. онъ же избра слугы своя мужи неистовы и посла на блаженнаго. нападше нань нощію погубите ѝ. и аще кто противится вамъ то и тыя погубите съ нимъ. о окаанне. нѣси ли слышалъ что рече Господь къ Каину о убіиствѣ брата своего Авеля. како не убояся суда Божіа рекшаго. аще ся кто гнѣваеть на брата своего повиненъ есть суду и муцѣ огненои [16]. ты же не токмо гнѣваешися. но и посылаеши нань рекыи. аще вы кто ся противить. и того съ нимъ погубите.

Блаженному же идущу къ брату своему. никоегоже зла помышляюще въ сердци своемъ. иже бы пріати отъ брата своего Святополка. идяше путемъ своимъ радуася. яко братъ мои старѣи сѣлъ на столѣ отнѣ. окаанныи же печаловашеся слышавъ брата грядущя къ себѣ. того ради погубить его посылаетъ. и се нѣціи пришедше къ блаженному повѣдаша. яко братъ твои хощетъ тя убити, блаженныи же Борисъ не ятъ вѣры глаголя, како се можеть быти истина. или не вѣсте. яко азъ меншіи. не противлюся брату своему старѣишему сущу. и по двою днею иніи пріидоша. възвѣстиша ему вся бывшая. и како братъ его отбѣжа святыи Глѣбъ. си слышавъ блаженныи Борисъ глагола сице. благословенъ Богъ не отъиду ни отбѣжю отъ мѣста сего. ни супротивлюся брату старѣйшему. но яко Богу годѣ тако буди. луче ми есть здѣ умрети. неже во инои странѣ быти. отвѣщаша ему сущіи съ нимъ вои. иже бѣша ходили на ратныя. бѣ бо ихъ до 8 тысящь. вси же въ оружіи [17] ркоша ему. мы владыко предани есме благымъ отцемъ твоимъ въ руцѣ твои. но да идемъ съ тобою или едины поидемъ. и тако его нужею ижженемъ изъ града. тебе же въведемъ. якоже преда намъ тебе благыи отець твои. си слышавъ блаженныи поистинѣ и милосердыи пекыися о нихъ аки о своеи братіи глагола имъ. ни братія и отци. не тако прогнѣваите господина моего брата. егда како на вы крамолу възведетъ. но уне есть мнѣ единому умрети нежели толико душь [18]. ни пакы смѣю противитися старѣишему брату. егда како суда Божіа не убѣжу. но молю вы ся братія и отци. да идете въ домы своя. азъ же шедъ паду на ногу его. еда како умилосердится на мя. моливъ же я много и цѣловавъ вся тако отпусті я. а самь съ отрокы пребысть на мѣстѣ томь день тыи всь [19]. бѣ бо посланъ съ молбою къ брату. онъже емъ отрокъ его удръжа. бѣ бо уже не милосердыи тъи [20]. посла на блаженнаго, да погубять его. видѣвъ же блаженныи Борисъ. яко не приде отрокъ его. воставъ поиде самъ къ брату своему. и се срѣтоша ѝ вѣстници глаголюще. яко послалъ есть братъ твои погубити тебе. и се ти уже грядутъ близъ. блаженныи възрѣвъ на небо рече. Владыко Господи Ісусе Христе не остави мене потибнути. но Ты самъ дръжав [21] руку Твою простри на мя грѣшнаго и худаго. избави мя отъ ярости идущихъ на мя и спаси мя въ часъ сіи, яко Ты единъ еси прибѣжище печальнымъ. Ты бо еси Богъ истинныи. и Тебѣ слава въ вѣкы аминь.

И повелѣ поставити шатеръ свои. и вшедъ в онь моляшеся Богу съ слезами припадая. дондеже не бѣ силы въ немъ. и паки падъ на ложи своемъ плакася горко молясл Богу. нощи же бывши повелѣ слугамъ принести свѣщу и вземъ книгы нача чести. и се они посланіи бѣша идуще. рикающе ако звѣріе дивіе поглотити хотяще праведнаго. слышавъ же блаженныи Борисъ. яко уже приближишася нань повелѣ прозвѵтеру отпѣти заутренюю и святое еуангеліе отчести. бѣ бо день недѣльныи. самъ же нача пѣти глаголя сице. Господи что ся умножиша ся на мя стужающеи ми. мнози въсташа на мя. и мнози глаголють души моеи. нѣсть спасеніа ему о Бозѣ его. Ты же Господи заступникъ мои еси [22] и прочіи псалмы. нечестивіи же яко пришедши не дерзнуша напасти на праведнаго. не попусти бо имъ Богъ. дондеже доконча блаженныи заутреннюю. такоже конча и цѣловавъ вся [23] възлѣже на одрѣ своемъ. и отверзъ уста своя и рече беззаконникомъ. влѣзши братья кончаите волю пославшего вы. ониже аки звѣріи дивіи нападоша нань и насунуша ѝ копіи. и се единъ отъ предстоящихъ ему слугъ падъ на немъ. ониже и того прободоша. и мнѣвше блаженнаго мертва суща изидоша вонъ. блаженныи же воскочивъ воторопѣ [24] изиде изъ шатра. и въздѣвъ руцѣ на небо моляшеся сице глаголя, благодарю Тя Владыко Господи Боже мои. яко сподобилъ мя еси недостоинаго обѣщника быти страсти Сына Твоего Господа нашего Ісуса Христа. посла бо единочадаго Сына Твоего въ миръ. да спасеть миръ. егоже беззаконники предаша на смерть. и се азъ посланъ быхъ отъ отца своего. да спасу люди отъ противящихся ему поганъ. и се нынѣ уязвенъ быхъ отъ рабъ отца своего. но отдаи же имъ Владыко грѣхъ тъи. мене же покои съ святыми Твоими. и не предаи же мене въ руцѣ врагомъ. яко Ты еси защититель мои Господи и въ руцѣ Твои предаю духъ мои.

И се ему рекше притекъ единъ отъ губитель удари въ сердце его [25]. и тако блаженныи Борисъ предаеть душю въ руцѣ Господни. мѣсяца июля. 24 день. честное же его тѣло вземше несоша въ Вышегородъ. еже есть отъ Кіева града столнаго 15 стадіи. и ту положиша. тѣло блаженнаго Бориса у церкви святаго Василіа.

И о томъ увѣдавъ окаанныи тъи яко на полунощныи страны бѣжалъ есть святыи Глѣбъ. и посла ѝ тамо да и того погубятъ. о немилосердіи окааннаго смысла. како не довлѣ ему о погубленіи единаго брата. но и на другаго посылаетъ рекыи. въскорѣ шедши погубите ѝ. ониже ту абіе вшедши въ кораблеци борзо и гнаша по святѣмъ Глѣбѣ дни многы. и уже имъ приближающимся къ нимъ. и узрѣша иже бѣша со святымъ Глѣбомъ. напрасно корабль исхожаше супротивитися имъ. и взяша оружіа своя хотяще супротивитися имъ. святыи же Глѣбъ моляшеся. да не супротивятся имъ. глаголаше бо имъ. братье моя аще ли ся имъ не супротивимъ. то аще имутъ мя. не погубять мене. но ведутъ мя къ брату моему. и онъ аще видѣтъ мя умилосердится на мя и не погубить мене. аще ли ся имъ супротивите. то и васъ иссѣкутъ и мене погубять. но молю вы братье моя. не супротивитеся имъ. но къ брегу приступите. азъ же въ своемъ кораблѣ иду посредѣ рѣкы. и они да придутъ ко мнѣ. ти видимъ. аще коего ради мира придоша. ащели же ни. то имуть и не погубять мене. но якоже преже рекохъ. ведутъ мя къ брату моему. онъ же аще видѣтъ мя и умилосердится на мя и не погубитъ мене. вы же токмо мало отступите къ брегу и не супротивитеся имъ. они же послушавши святаго идоша къ брегу и жаляще си зѣло по святѣмъ. и часто озаряющися хотяще видѣти. чтó хощетъ быти святому. се же святыи молі я блюдя егда како и тѣхъ погубять и прольють кровь неповинныхъ. хотя бо святыи единъ за вся умрети. и сего ради отпусті я. самъ же съ отрокы своими въ кораблеци посредѣ рѣкы пловыи.

Окаанніи же то видѣвше корабль единъ пловуще посредѣ рѣкы и святаго въ немъ стояща. устремишася по немъ акы звѣріе дивіи. святыи же видѣвъ я идуща нань възрѣвъ на небо пояше сице глаголя. суди обидящимъ мя и възбрани борющимся со мною. и пріими оружіе и щитъ и стани въ помощь мнѣ. иссуни оружіе и щитъ предъ гонящимъ мя. рци души моеи. спасеніе твое есмь Азъ. да постыдятся и посрамляются вси ищущіи. душа моея. хотяще изяті ю, да възвратятся въспять. и постыдятся хотящіи зла рабу твоему. буди путь ихъ тма и соблазнъ [26]. и прочіи псалма того святому рекши. и се нечестивіи приближишася. и имше корабль ключи привлекоша къ себѣ. а иже бяху съ святымъ въ корабли. то тіи заложивше весла сѣдяху. сѣтующи и плачущи по святѣмъ. бѣже за святымъ сѣдяи иже бяше старѣишина поваромъ. и повѣлеша тому нечестивіи заклати святаго Глѣба. глаголюще ему. возми ножъ свои и зарѣжи господина своего. да не злою смертію и самъ умреши. окаанныи же поваръ тои не поревновавъ оному иже бѣ палъ на святомъ Борисѣ. но уподобися Іюдѣ предателю. извлекъ мечь свои. ятъ святаго Глѣба за честную главу. хотяи заклати. святыи же Глѣбъ молчаше аки агня незлобиво. весь бо умъ имяше къ Богу и възрѣ на небо молящеся сице. Господи Ісусе Христе Сыне Боже мои. услыши мя въ часъ сіи и сподоби мя причастнику быти святыхъ Твоихъ таинъ. се бо Владыко якоже древле въ сіи день Захарья заколенъ бысть предъ требникомъ Твоимъ. и се нынѣ азъ закалаемъ есмь предъ Тобою Господи. но Господи Господи не помяни беззаконіи моихъ первыхъ. но спаси душю мою. да не срящеть ея лукавныи съсвѣтъ [27]противныхъ. но да пріимуть ю ангели Твои свѣтлѣи. яко Ты Господи Спаситель мои. сія же творящимъ я прости. Ты бо еси Богъ истинныи и Тебѣ слава въ вѣкы аминь.

Си же святому Глѣбу рекшу. и се преже реченныи поваръ именемъ Торчинъ. ставъ на колѣну за главу святому и прерѣза гортань ему. и тако тои святыи Глѣбъ предасть душю свою въ руцѣ Божіи мѣсяца сентяврія въ 5 день. окаанніи же тіи несше тѣло святаго Глѣба повергоша въ пустыни межю двѣма кладома [28]. ти тако отъидоша къ окаанному Святополку и възвѣстиша ему вся яже сътвориша святому.

И се слыша не милосердыи тои не сжалися о томъ. ни поне мало исправися отъ того. но и на прочію братію гоненіе подвиза. хотя вся изгубити и самъ владѣти хотя всѣми странами. но Богъ свѣдыи таины сердечныя и хотя всѣмъ человѣкомъ спастися и во разумъ истинныи пріити не попусти окаанному тако сътворити. но потреби ѝ отъ земля тоя. крамолѣ бывши отъ людеи. изгнану ему быти не токмо изъ града. но изо всея власти [29] избѣжавшу ему въ страны чюжая. и тамо животъ свои злѣ развръже. бываеть бо смерть грѣшникомъ люта [30]. мнози бо глаголють видѣвше его въ рацѣ тако суща. якоже Иульана законопреступнаго.

Тако же по умертвіи окааннаго прія власть блаженною братъ именемъ Ярославъ. и тоиже бѣ старѣи блаженнаго. бѣ же мужъ праведенъ и тихъ ходя въ заповѣдехъ Божіахъ. повелѣ же христолюбивои тои князь изискати тѣло святаго Глѣба. егоже много искавше и необрѣтоша. по лѣтѣ же единемъ ходяще ловци. и обрѣтоша тѣло святаго лежаще цѣло. ни звѣремъ бо ни птицамъ же не прикоснувшимся ему. и абіе шедши въ градъ възвѣстиша старѣишинѣ граду. онъ же шедъ съ отрокы видѣ тѣло святаго свѣтящися аки молніа. и ужасенъ бывъ повелѣ слугамъ своимъ на мѣстѣ томъ стрещи тѣло святаго Глѣба. дондеже посла и възвѣсти христолюбивому князю Ярославу. тогда ему столъ отца своего предръжащу. иже слышавъ списа епистолію къ старѣйшинѣ града того. да въскорѣ послеть по тѣло блаженнаго Глѣба въ прежереченыи градъ. идѣже бѣ святаго Бориса тѣло положено. старѣишина же ту абіе повелѣ отрокомъ уготовати кораблець. и тако вземше тѣло святаго Глѣба съ свѣщами и съ теміакомъ и съ великою честію несоша въ корабль. ти тако отплуша. бывшу же строину вѣтру. и приплуша въ нарочитыи день града. и ту положиша въ рацѣ тѣло святаго Глѣба. окрестъ блаженнаго Бориса у церькви святаго Василіа. идеже и чюдеса многа показа Богъ угодницу своею ради. 

Примѣчанія: 
[1] Восток. опис. Рум. муз. стран. 200. 201. 
[2] Опис. ркп. Толст. отд. 1. № 292. Опис. ркп. Царск. № 87. Опис. ркп. Рум. муз. № 152. Сборн. Солов. библ. № 850. Ркп. минеи Солов. библ. № 514 и 518. 
[3] Опис. Рум. муз. № 152. 
[4] Этотъ списокъ находится въ старинной минеи подъ № 518, написанной, какъ означено въ сдѣланной въ ней припискѣ, въ 7002 (1494) г. Здѣсь сказаніе помѣщено между другими древними памятниками русской письменности, каковы сочиненія св. Иларіона, Іакова мниха и др. Кромѣ того при печатаніи мы имѣли въ виду еще два другихъ его списка, именно въ сборникѣ № 830, написанномъ также въ концѣ XV или началѣ ХVІ в., и въ минеи-четьи № 514., написанной, какъ значится въ одной ея припискѣ, въ 1569 г. 
[5] Извѣстно, что это сочиненіе давно уже приготовляется къ изданію Императорскимъ Археологическимъ обществомъ. Нисколько не думая, что отпечатаніе сказанія въ «Православномъ Собесѣдникѣ», въ самомъ простомъ видѣ, могло бы замѣнить въ какомъ-нибудь отношеніи предполагаемое изданіе общества, мы однакожъ не считаемъ наше изданіе лишнимъ и безполезнымъ, по крайней мѣрѣ для тѣхъ изъ нашихъ читателей, до которыхъ не доходятъ ученыя изданія общества. 
[6] По языку и способу писанія предлагаемый списокъ принадлежитъ къ такъ называемой синкретической или смѣшанной рецензіи. Потому въ немъ древніе палеографическіе признаки перемѣшаны съ новыми знаками, входившими въ письменность въ XV в. 
[7] Съ греч. слова: παράδεισος — рай. 
[8] Марк. 16, 15-16. 
[9] Матѳ. 20, 1-7. 
[10] препону, препятствіе. 
[11] потому что еще были молоды. 
[12] возрастомъ. 
[13] юнъ, молодъ. 
[14] отчей, отцовской. 
[15] сей. 
[16] Матѳ. 5, 22. 
[17] Въ минеѣ № 514 прибавлено: бяху
[18] Въ минеѣ № 514. прибавлено: погубити
[19] весь. 
[20] тотъ. 
[21] державную? 
[22] Псал. 3, 1-5. 
[23] Въ минеи № 514 прибавлено: слуги. 
[24] торопливо. 
[25] Въ минеѣ № 514 прибавлено: мечемъ
[26] Псал. 34, 1-6. 
[27] совѣтъ. 
[28] Въ минеѣ № 514: колодома
[29] области, владѣнія. 
[30] Псал. 34, 22. 
 

Источникъ: Памятники Древле-Русской духовной письменности: Сказаніе преп. Нестора о житіи и убіеніи благовѣрныхъ князей Бориса и Глѣба. // Журналъ «Православный собесѣдникъ», Казань. – 1858 г. – Книга I. – с. 578-604. 

http://nasledie.russportal.ru/index.php?id=pateric.borisogleb2



Подписка на новости

Последние обновления

События